Tomta er det frodige arealet heilt nede i bildet, det den raude pila peikar. Hovudvegen skimtar du i venstre kant, ein tredjedel opp frå nedre kant. Tilkomstvegen til tomta di ser du også, nede i venstre hjørne. Det er Fjelbergøy som stikk seg inn i fjorden frå venstre. Stord i bakgrunnen. Bildet er tatt frå GULLHAUG.
23.01.2025 Kategori: Hustomt
FRITTLIGGJANDE UTSIKTSTOMT TIL SALS PÅ HALSNØY
Me vil gjerne i gang med det flotte prosjektet vårt på GULLHAUG denne våren, men treng eigenkapital. Derfor vil me selja draumetomta vår, som ligg ved vestfoten av GULLHAUG. Les gjerne meir om GULLHAUG her viss du er interessert.
Har du ikkje bruk for hustomt nett i dag, så er dette likevel eit godt investeringsobjekt. For denne typen frittliggjande tomter finst det ikkje mange av i dag, alle ligg vanlegvis i tette byggefelt.
Dette er den siste frittliggjande tomta på Fatland.
NB! Denne nettsida må sjåast på som ein generell presentasjon av prospektet, og ikkje som del av ein eventuell kjøpekontrakt. Det er berre det som står i kjøpekontrakten som gjeld.
Tomta er omlag i det området som er merka med T. Det er på Fatland, på Halsnøy, i Kvinnherad kommune.
20.01.2025 Kategori: Hustomt
OM TOMTA
Tomta er gnr 206 bnr 79 i Kvinnherad kommune, sør på Halsnøy. Ho ligg i Gullhaugvegen, husnummer er ikkje fastsett enno.
Prisen for tomta åleine er 750 000,-, ferdig regulert og frådelt.
Men viss me inngår handelen før 1. mars 2025, så får du heile 100 000,- i rabatt!!!
I prisen inngår veg fram til tomtegrensa. Pluss fantastisk panoramautsikt utover Klosterfjorden og Hardangerfjorden, med Stord og solnedgangen lengst i vest.
Les nedanfor om andre forhold som er aktuelle og interessante. Klikk på bilda for å sjå større versjon.
Fellesvisning kan me kanskje komma til å ha, men ta berre kontakt viss du vil ha visning spesielt for deg. Kontakt Arne Gjerde på telefon 938 17 200, eller på epost arne.gjerde@outlook.com.
Har du aldri vore på Fatland før? Ta deg ein tur og opplev Fatlandskogen på nært hald. Det er verdas flottaste friluftsområde, rett utanfor stovedøra di. Og der treffer du alltid folk. I dag, i skrivande stund, har det vore massevis av folk i skogen, og dei koste seg veldig i januarsola.
Tomta er merka med T. Gullhaug er merka med GH. Tilleggsarealet X kan kjøpast om du ønskjer det. Ny veg er teikna med svart strek. Den er inkluder i tomteprisen, fram til tomtegrensa.
20.01.2025 Kategori: Hustomt
AREALET
Tomta ligg i eit ormåde som er regulert til bustadhus. Alt er klart, berre send byggesøknad, og bygg når du får godkjenninga!
Arealet er på ca 760 m2, med lengderetningen mot vest. Det betyr at huset bør helst ha aust-vest som møneretning, men ikkje nødvendigvis.
Tomta har førsteklasses hagejord. Slik ho ligg til i terrenget, med lett skråning mot vest, er ho perfekt for dei fleste typar hagevekstar.
Mellom tomta og reguleringsgrensa i aust ligg det eit areal, ca 350 m2. Dette kan du kjøpa i tillegg om du ønskjer. Tilleggsarealet vil leggja ein ekstra dimensjon til tomta viss du byggjer hus i to etasjar, sjå eksempel på det nedanfor. Denne austre delen vil kunna gi eit fantastisk flott og flatt hageområde, på le-sida av huset, men likevel med massevis av sol.
Hagejorda er ekstremt god på tomta, sidan dette for mange år sidan var jordbæråker. Roser og andre krevjande vekstar har me god erfaring med på Fatland, ikkje minst her i Gullhaug-området.
20.01.2025 Kategori: Hustomt
PRIS
Prisen på tomta er 750 000 kroner.
Ved inngått avtale før 1. mars 2025 får du heile 100 000 kroner i avslag!!!
Rabatten får du berre fordi me vil i gang snarast med prosjektet vårt på Gullhaug, der me treng eigenkapital. Får me ikkje tak i den fort, blir prosjektet utsett på ubestemt tid. Alderen vår må nemleg takast omsyn til.
I tillegg til prisen kjem kostnader med tinglysing. Men ingen kostnader til oppmåling, for tomta er oppmålt og frådelt allereie. Heller ingen kostnader til meklar, for salet går direkte mellom deg og oss, med banken din som medspelar.
Tilleggsarealet kostar 150 000 kroner, pluss kostnader til oppmåling og tinglysing. Ingen kostader til meklar.
Kabelgrøfter på Fatland.
20.01.2025 Kategori: Hustomt
INFRASTRUKTUR
Veg: Tomta har bilveg fram til tomtegrensa inkludert. Dei siste 10 metrane fram er ikkje klare enno.
Vatn: Tilkopling til kommunalt vatn, på kommunen sine standard vilkår.
Avløp: Tilkopling til felles avløpssystem for Fatland, etter vilkåra som gjeld der. Nett nå arbeider me for at kommunen skal overta dette systemet. I så fall blir det etter kommunen sine standard vilkår. Felles slamavskiljar med nabotomta.
Straum: Straum skal førast i jordkabel til skap i tomtegrensa. Vilkåra for dette må avklarast. Felles skap med nabotomta.
Breiband: Breiband blir ført fram som fiberkabel til straumskapet i tomtegrensa. Abonnement hos Kvinnherad Breiband AS, på deira standard vilkår.
Som du ser så er ikkje alt som gjeld infrastruktur heilt avklart per i dag, noko som skuldast forhandlingar som foregår med kommunen nett i desse dagar. Det kan derfor komma endringar inn her, i form av meir konkret informasjon.
20.01.2025 Kategori: Hustomt
AKTIVITETAR PÅ FATLAND
Det er enormt mykje å ta seg til nær tomta di, for den som ikkje er avhengig av typiske by-aktivitetar.
Ballbinge, 2 min gange frå tomta.
Fellesområde, med leikeplass, gapahus, puttgolf, gjesteparkering, stor plen, med meir, 2 min gange frå tomta.
Fatlandskogen tur- og aktivitetsområde, berre 3 min gange frå tomta, les meir.
Fatland aktivitetshus, med kommunalt tilrettelagde aktivitetar for vaksne av alle kategoriar, 6 min gange frå tomta. Eit fantastisk miljø, med ulike aktivitetar for begge kjønn og alle aldersgrupper. Ikkje minst er det mange pensjonistar som kjem hit, frå heile kommunen.
Badestrand i Fatlandshavnen, 10 min gange frå tomta.
Fatland grendahus, 10 min gange frå tomta. Dette huset har profesjonelt kjøken og oppdekning for 80 personar. Du kan leiga det til selskap og fest.
Arnavik båthamn, 1,2 km frå tomta.
Fatland Vel har føre seg både det eine og det andre av fellestiltak, til beste for bygda.
Studer nettsida fatland.info. Der finn du mykje meir om bygda og kva du kan finna på her og i nabobygdene.
Ballbingen tilbyr eit hav av ulike aktivitetar. Kan også brukast til samlingar av ymse slag.
Naturstien i Fatlandskogen er eit eldorado som ligg berre fem min gange frå tomta. Massevis av spennande trefigurar, aktivitetar og informasjonsplakatar.
Om våren er det kvart år ei populær friluftsgudsteneste på Gullhaug.
I Fatlandskogen er det fleire gapahukar med bålpanne.
Litt av turgruppa ved Fatland aktivitetshus.
Mange av mannfolka ved Fatland aktivitetshus elskar snikring. Mykje av det dei lagar blir selt, eller lodda ut på basaren.
Det er alltid smekkfullt hus under basarane til Fatland aktivitetshus. Her gjer Sissel klar utstilling av gevinstar som dei har laga sjølve.
Fellesområdet nede ved hovudvegen. Bildet er eit par år gammalt, så gapahuset i bakkant er ikkje ferdig her.
Dekka til selskap i Fatland grendahus.
Dugnad i regi av Fatland Vel. Då er det godt med ein kakekaffipause.
På Fatland har me solide tradisjonar for orienteringsløp.
Også for tur-orientering.
Av og til kan ein skeisa på Fatlandsvatnet.
Det frivillige laget Gullhaugkonsertane arrangerer friluftskonsertar på Fatland. Mest om sommaren, men også eit par i vinterhalvåret.
Badeliv i Fatlandshavnen.
Ferjekaien på Sydnes.
21.01.2025 Kategori: Hustomt
AVSTANDAR
Fatland er det me kan kalla ei sentral utkantbygd. Utkant, fordi det ikkje bur så mange her, og fordi det er massevis av flott natur rundt deg. Sentralt, fordi det er kort veg til dei lokale sentra du treng til dagleg.
Dessutan er det lett å komma seg til større plassar om du vil det innimellom. Men for å treffa folk å prata med, treng du berre gå fem minutt inn i Fatlandskogen.
Til Arnavik båthamn er det 1,2 km.
Til Sydnes ferjekai er det 2 km. Derifrå går det ferje til Fjelbergøy og Borgundøy, men også til Utbjoa på Haugalandet. Med bil vidare til Haugesund (50 min) og Stavanger (2 timar, inkl ferje over Boknafjorden).
Til Ranavik ferje- og snøggbåtkai er det ca 15 km. Derifrå går det ferje til Skjersholmane på Stord. Og det går snøggbåt til Stord og Bergen, og mange andre stader i Sunnhordland.
Til Årsnes ferjekai er det 52 km (1 time). Ferje over til Gjermundshamn (20 min). Derifrå tar det 1,5 time til Bergen sentrum, det same til Flesland flyplass.
Til Halsnøy skule (barneskule) er det 12 km. Det tar berre 3 min å gå frå tomta ned til busstoppen på Fatland, der det er leskur.
Sæbøvik nærsentrum er berre 9 km unna, altså 10 minutt med bil. Der finn du matbutikk med post, ungdomsskule, kulturhus, alders- og sjukeheim, gatekjøken, bar, pub, frisør, legesenter, fysioterapeut, bruktbutikk, gåve- og leikebutikk, bensinstasjon, byggevarer, selskapslokale, catering, mm.
Nærmaste regionssenter er Husnes, berre 15 km unna. Der finn du det meste av det du treng av butikkar og service.
Rosendal er kommunesenteret, og det ligg 44 km innover fjorden.
Skal du ut og fly? Frå tomta bruker du 1 time til Stord lufthamn Sørstokken (bil+ferje+bil, gratis parkering på flyplassen), 2 timar til Bergen Lufthamn Flesland (bil+snøggbåt+flyplassbuss) og knappe 2 timar til Haugesund Lufthavn Karmøy (bil+ferje+bil).
20.01.2025 Kategori: Hustomt
NÆRINGSAKTIVITET FRÅ FATLAND
Har du tankar om å byggja deg hus ein stad der du kan driva næringsaktiviteten din, eller eventuelt byggja opp ny næringsverksemd? Då må du verkeleg vurdera Fatland.
Generelt tenkjer folk på slike bygder som ein stad å bu, for å pendla til arbeid ein annan stad. Og det gjeld jo her også, det er mange som pendlar. Me kallar gjerne Fatland for ei sentral utkantbygd, fordi det er så lett å komma seg til og frå.
Men du kan driva med mykje her i bygda også. Seljaren av tomta har i nesten alle år drive utvikling av internasjonal programvare herifrå. Det er like enkelt her som i Oslo sentrum, og mykje billigare.
Me har også Fatland bustadfelt, som ligg like ved den tomta som er til sals ovanfor. Er du eigedomsutviklar, kan du kjøpa dette feltet, for ein svært god pris. Les salsprospektet her.
Me har også eit lite sagbruk med stor trevareverkstad, berre 8 min gange frå tomta. Her er det trong for ny aktivitet og fleire arbeidsplassar.
I reguleringsplanen for Fatland er det sett av eit par næringsareal. Har du tankar om kontor, småindustri, handel, etc, vil areal T1 vera perfekt. Arealet er flatt, og det ligg inntil hovudveg. Sjå kartet ved sida av. Klikk på kartet for å sjå større versjon. Hustomta di er forresten merka med 79 (bruksnummeret) heilt øvst i kartet.
Er du ein kreativ person, med massevis av gode idear? Då er det deg me treng!
Slik kan huset ditt sjå ut, frå vest. Garasje i kjellaren, og to etasjar over, med terrasse utanfor begge. Til høgre er eit tårn, som gir eit ekstra rom ein etasje over dei andre.
20.01.2025 Kategori: Hustomt
KORLEIS UTNYTTA TOMTA DI BEST
Som du ser på kartet så er tomta smal og lang, retning aust-vest. Det er perfekt fasong for eit hus som har slik møneretning.
Du ser nok fort at tomta blir veldig mykje betre viss du også inkluderer tilleggsarealet i austkant. Då kan du nemleg laga eit to- eller tre-etasjes hus, med garasje og ein del andre rom nede, og med sjølve heimen oppe. Det medfører at du får fenomenal utsikt oppe.
Men med tilleggsarealet får du ein annan fordel i tillegg, nemleg eit stort horisontalt hageområde i bakkant. Her er det veldig god jord, såkalla superbonitet, for allslags hagevekstar, inkludert matauk. Eller berre ein romsleg plen, om du liker det best.
Huset på skissa til venstre tar utgangspunkt i dette. Du har den koselege og lune hagen bakom huset, men med massevis av sol der også, heilt til elleve om kvelden på jonsokafta. Og så kan du ha ein enklare hage på framsida, der du kanskje heller bruker noko av plassen som gjesteparkering.
Same huset som ovanfor, men her sett frå sør. Tårnet i midten har utsikt mest vestover mot fjorden. Den lune hagen kan du ha på oppsida, altså til høgre på denne skissa.
20.01.2025 Kategori: Hustomt
HUSTEIKNINGANE LIGG KANSKJE OG VENTAR PÅ DEG
For nokre år sidan var det aktuelt for ein liten famili innan vår eigen familie å byggja på tomta, og ein flink arkitekt vart sett til å laga teikningar av draumehuset. Prosjektet vart lagt bort den gongen, av fleire grunnar.
Men teikningane er framleis like skreddarsydde for denne tomta. Særleg viss du også kjøper tilleggsarealet i austkant. Kanskje dette huset er noko for deg?
Til venstre ser du to skisser frå arkitekten, på eit alternativ med garasje i kjellaren, og to bustadetasjar over, pluss eit tårn, som gir ekstra utsikt. Dette er jo eit spektakulært bygg, som naturlegvis kostar litt. Men han laga også enklare skisser.
Seljar har kosa seg litt med å laga ein 3D-modell basert på ein litt enklare variant, med to etasjar, og garasje i den nedste av desse. Den kan du sjå her. Bruk funksjonane nede til høgre i skjermbildet for å flytta deg rundt i huset. Bruk gjerne auget, kombinert med piltastane, det er praktisk.
Du kan ikkje flytta deg mellom etasjane ved å bruka trappa i modellen, men ved å klikka på dei tre meny-prikkane heilt nede i høgre hjørne.
Liknar noko av dette på draumehuset ditt? I så fall tar du kontakt med arkitekt Terje Lamo på Stord og spør om han har ein grei pris på teikningane.
Og i så fall kan det gå radig å få opp huset. Byggesøknad må sjølvsagt sendast inn og godkjennast. Og byggefirmaet ditt må koma i gang.
Er du rask nok, har du hus å flytta inn i til sommaren!
Er det noko du lurer på, er Fatlandsvatnet beste plassen å setja seg ned for å filosofera litt. Gjerne saman med oss.
20.01.2025 Kategori: Hustomt
ER DET NOKO Å LURA PÅ?
Er du enno ikkje heilt overbevist om at dette er noko for deg? At Fatland er plassen du vil bu, saman med familien din? Som du kanskje ikkje har stifta enno, men som du også lurer litt på?
Ta ein tur hit, og lur vidare. Eller spør på epost ARNE.GJERDE@OUTLOOK.COM eller telefon 938 17 200.
Me har ikkje tenkt å lura deg! Men du må vita kva du vil, og me kan iallfall hjelpa deg til å vita kva du får.
Dette er tomta di, sett frå øvre del av same tomta. Bildet er tatt for fleire år sidan, så vegetasjonen er litt annleis i dag, men utsikta er den samme. Tilførslevegen kjem inn frå venstre i nedre kant av tomta, og går langs nedre kanten, heilt bort til høgre kanten. Bildet omfattar også nabotomta til høgre, den er seld. Fatlandshavnen ligg nett til høgre for den store tujaen midt i bildet. Granskogen du ser midt i bildet mot venstre, ned mot sjøen, er borte i dag.